الثلاثاء، 11 يناير، 2011

فشة خلق


هودي الحكام بلبنان
شغلتهن ببساطة
يضحكواععقول الناس
بخطابات المطاطة
عاملين علينا شطّار
زعامات وريّاس كبار
وهني ماسكين القرار
وسفارات بلاد كتار
بتحكمهن بسبّاطا
ساعة شهود زور وتحرير
وساعة إصلاح وتغيير
والحقيقة مهمة كتير
وفتنة وترهيب وتهجير
والسين السين شو هالتعتير
والمواطن عقلو زغير
مطاليبو رحت سلاطة
عجقة وتهديد وتخوين
وهني بالعالم حاسّين
وبيغلّوا سعرالبنزين
والبندورة والطحين
والعالم معترين
وآخرتهم عل بطاطا
لو في كرامي هالشعب
بيحكمهن ينعدموا ضرب
أو رمياً بالشحاطة
وبيدفنهن بي شي جل
وبيكتب عل بلاطة
هيدي نهاية الرياس
يللي حرقوا قلوب الناس
ويللي باعوا هم الناس
ودم الناس
وبلد الناس
بكرسي وكدسة فراطة
ويللي كاين قهر الناس
وظلم الناس
وجوع الناس
وبيع الناس
ونهب الناس
طول عمرو عم يتعاطى